Кыргызстандарт

Жыл сайын ноябрь айынын экинчи бейшембисинде дүйнөнүн көптөгөн өлкөлөрүндө Бүткүл дүйнөлүк сапат күнү (World Quality Day) белгиленет. Бул күн коомчулуктун, мамлекеттик органдардын жана бизнес өкүлдөрүнүн көңүлүн продукциянын жана кызмат көрсөтүүлөрдүн сапатына, атаандаштыкка жөндөмдүүлүктү жогорулатууга, заманбап стандарттарды киргизүүгө жана сапат маданиятын калыптандырууга бурууга багытталган.

      Бул күндүн тарыхы 1989-жылдан башталат. Аны өткөрүү сапат жаатындагы алдыңкы эл аралык уюмдардын: Европа сапат уюмунун (EOQ), Япониянын окумуштуулар жана инженерлер союзунун (JUSE), Американын сапатты контролдоо коомунун (ASQC) жана Латын Америкасынын сапат боюнча уюмунун демилгеси менен уюштурулган. Бүткүл дүйнөлүк сапат күнү биринчи жолу 1989-жылдын 9-ноябрында Бириккен Улуттар Уюмунун (БУУ) колдоосу менен белгиленген. 1990-жылы БУУ бул демилгени эл аралык деңгээлде жайылтууну колдогон.

      Кыргыз Республикасында продукциянын жана кызмат көрсөтүүлөрдүн сапатын жана коопсуздугун камсыз кылуу, ошондой эле улуттук стандартташтыруу, метрология жана шайкештикти баалоо системаларын өнүктүрүү маселелери өзгөчө мааниге ээ. Белгиленген талаптарды сактоо жана эл аралык стандарттарды колдонуу ата мекендик продукциянын атаандаштыкка жөндөмдүүлүгүн жогорулатууга, экспорттук мүмкүнчүлүктөрдү кеңейтүүгө жана керектөөчүлөрдүн укуктарын коргоого өбөлгө түзөт.

      Кыргыз Республикасынын Экономика жана коммерция министрлигине караштуу Стандартташтыруу жана метрология борбору (Кыргызстандарт) сапаттын улуттук инфраструктурасын өнүктүрүүгө, стандартташтыруу жаатындагы ченемдик базаны өркүндөтүүгө, өлчөөлөрдүн бирдиктүүлүгүн камсыз кылууга жана шайкештикти баалоо жол-жоболорунун натыйжалуулугун жогорулатууга багытталган ишмердүүлүктү жүргүзөт.

      Бүткүл дүйнөлүк сапат күнү — сапаттын маанисин белгилөө менен гана чектелбестен, коопсуз, ишенимдүү жана атаандаштыкка жөндөмдүү продукцияны түзүүдө мамлекеттин, өндүрүүчүлөрдүн, кызмат көрсөтүүчүлөрдүн жана керектөөчүлөрдүн биргелешкен жоопкерчилигин эске салуучу маанилүү күн.

      Кыргызстандарт бардык уюмдарды, ишканаларды жана рыноктун катышуучуларын сапат маселелерине туруктуу көңүл бурууга, сапатты башкаруунун заманбап ыкмаларын киргизүүгө жана өз ишмердүүлүгүн үзгүлтүксүз өркүндөтүүгө чакырат.

Сапат — ишенимдин, коопсуздуктун жана туруктуу өнүгүүнүн негизи!