Кыргызстандарт

Кыргызстандарт базасында калктын жана уюмдардын энергетикалык сабаттуулугун жогорулатуу боюнча семинар өткөрүлдү

2025-жылдын 5-мартында Кыргыз Республикасынын Экономика жана коммерция министрлигине караштуу Стандартташтыруу жана метрология борборунун базасында Кыргызстандарттын адистери тарабынан уюштурулган семинар болуп өттү. Семинардын темасы:

«Калктын жана уюмдардын энергетикалык сабаттуулугун жогорулатуу, энергияны натыйжалуу пайдалануу, энергияны үнөмдөө жана экологиялык маселелерди чечүү – Япониянын тажрыйбасынын негизинде».

Иш-чаранын жүрүшүндө катышуучулар Япониянын энергияны үнөмдөө жана экологиялык туруктуулук жаатындагы алдыңкы тажрыйбалары менен таанышып, уюмдарда жана үй чарбаларында энергияны натыйжалуу пайдалануунун эффективдүү механизмдерин жана стратегияларын үйрөнүштү. Энергияны үнөмдүү колдонуу технологияларын жана саясаттарын ишке ашыруу боюнча практикалык сунуштар семинардын негизги багыттарынын бири болду.

Айрыкча, калктын энергияны үнөмдөө боюнча маалымдуулугун жогорулатууга жана ISO 50001:2018 эл аралык стандартынын маанисине көңүл бурулду. Бул стандарттын уюмдардын энергия натыйжалуулугун жогорулатуудагы, чыгымдарды азайтуудагы, экологиялык туруктуулукту жакшыртуудагы жана ишканалардын атаандаштыкка жөндөмдүүлүгүн жогорулатуудагы орду кеңири талкууланды.

Семинар тажрыйба жана билим алмашуу үчүн маанилүү аянтча болуп, анда эксперттер Кыргыз Республикасында туруктуу энергетикалык демилгелерди ишке ашыруу боюнча практикалык чечимдерди сунушташты. Бул энергияны натыйжалуу пайдаланууга жана өлкөдөгү экологиялык кырдаалды жакшыртууга өбөлгө түзөт.

Иш-чарага тематикалык министрликтердин жана мекемелердин өкүлдөрү, ошондой эле энергияны натыйжалуу пайдалануу боюнча чечимдерге кызыкдар чакан жана орто бизнес өкүлдөрү катышты.

Мамлекеттин, бизнестин жана калктын биргелешкен жана системалык мамилеси Кыргыз Республикасында көмүр кычкыл газын бөлүп чыгарууну азайтуунун негизги факторлорунун бири болуп саналат.

Энергияны үнөмдөөгө багытталган жаңы ой жүгүртүү жана күнүмдүк жашоо образы энергияны натыйжалуу пайдаланууну жогорулатууга, чыгымдарды азайтууга жана натыйжада экологиялык көйгөйлөрдү чечүүгө жана коомдун туруктуу өнүгүшүнө салым кошууга шарт түзөт.